Logo

स्पेनी प्रान्तीय सरकार सभामुखद्वारा पाटन दरबार क्षेत्र अवलोकन


स्पेनको स्वायत्त प्रान्त एक्टेमदुराका सभामुख तथा सोसलिस्ट पार्टी अध्यक्ष ब्लान्का मार्टिन डेलगाडोसहितको टोलीले आज विश्वसम्पदा सूचीमा सूचीकृत ललितपुर महानगरपालिका–१६ स्थित ऐतिहासिक पाटन दरबार क्षेत्रको अवलोकन गरेको छ ।

पाटनको धार्मिक तथा सांस्कृतिक पहिचानलाई थप अघि बढाउन र सोबारे जानकारी हासिल गर्न उक्त भ्रमण गरिएको हो । भ्रमण टोलीले पाटन दरबार सङ्ग्रहालयका तीनै चोकका साथै दरबार परिसरमा रहेका जगत्नारायण, हरिशङ्कर र कृष्णमन्दिरका बारेमा जानकारी लिएको थियो ।

सभामुख तथा अध्यक्ष डेलगाडोले पाटन दरबार क्षेत्र गुगलमा देखिएभन्दा निकै राम्रो भएकाले सोको जगेर्ना गर्न उपस्थित महानुभावलाई आग्रह गर्नुभयो । वाग्मती प्रदेश सरकारका सभामुख सानु श्रेष्ठले अवलोकनपछि सो टोलीले स्पेन फर्किएर बुद्ध उद्यान निर्माण गर्ने बताउनुभयो । उहाँले भन्नुभयो, “यस भ्रमण मुलुकका लागि निकै फलदायी र उपलब्धिमूलक हुने विश्वास लिएको छु ।”

यसैगरी लपु महानगरपालिकाका प्रमुख चिरीबाबु महर्जनले सो भ्रमणबाट ललितपुरको पहिचान थप अघि बढ्न सहयोग पुगेको विश्वास व्यक्त गर्नुभयो । टोलीले पाटन दरबार क्षेत्रको हिरण्यवर्ण महाविहारका साथै कृष्णमन्दिर अगाडि दुई पाटीको बारेमा समेत जानकारी लिएको थियो ।

रासस

प्रतिक्रिया दिनुहोस्