Logo

विमान उडिरहेका बेला ढोका खोल्न खोज्ने महिलालाई २ वर्षको जेल सजाय



एजेन्सी । उडिरहेका बेला जबर्जस्ती विमानको ढोका खोल्न खोज्ने एक बेलायती महिलालाई अदालतले दुई वर्ष जेल सजाय सुनाएको छ।

२६ वर्षीया क्लोइ हेन्सले गत वर्षको जुनमा बेलायतको स्ट्यानस्टेड विमानस्थलबाट टर्कीतर्फ उडेको विमानको ढोका खोल्न खोजेकी थिइन्।

उनलाई रोक्न खोज्ने चालकदलको एक सदस्यलाई उनले चिथोरेकी पनि थिइन्। ‘म मर्न चाहन्छु। र तिमीहरु सबैलाई मारिदिन्छु,’ उनले विमानमा चिच्याएकी थिइन्।

यो घटनापछि विमानमा होहल्ला मच्चिएको थियो। विमानलाई फिर्ता ल्याउन बेलायती सेनाका दुई लडाकु जहाज पनि उडेका थिए। अन्ततः विमानलाई स्ट्यानस्टेड विमानस्थलमै अवतरण गरिएको थियो।

तत्कालै प्रहरीले उनलाई गिरफ्तार गरेको थियो। उनले विमानका यात्रुको सुरक्षामा खतरा निम्त्याएको र एक जनालाई पिटेको आरोप स्वीकारेकी छन्।

जेट २ एयरलाइनको सो उडानमा २ सय ६ यात्रु थिए।

त्यसबेला अल्कोहल र औषधि खाएर उनी पूर्ण रुपमा होसमा नभएको वकिलले दाबी गरेका छन्।

विमान उडिरहेको बेला त्यसको ढोका खोल्न सम्भव नहुने तर्क अदालतमा गरिएको थियो।

प्रतिक्रिया दिनुहोस्