Logo

असार १५ मनाउँदै कृषि मन्त्री खनालले नाँच्दै-गाउँदै रोपे धान



काठमाडौं : आज १५औँ राष्ट्रिय धानदिवस विभिन्न कार्यक्रम गरी मनाइँदैछ । ‘धान उत्पादनमा वृद्धि राष्ट्रको समृद्धि’ नारासहित विभिन्न स्थानमा राष्ट्रिय धान दिवस मनाउँदैछ । नेपाल कृषि अनुसन्धान परिषद् (नार्क) र  राजनीतिक दलसम्बद्ध किसान संगठनहरूले पनि छुट्टाछुट्टै रूपमा धान दिवस मनाउने तयारी गरेका छन् । असारको १५ भइसक्दा १२ प्रतिशत मात्र रोपाइँ भएको कृषि विभागले जनाएको छ ।

नेपाल कृषि अनुसन्धान परिषद् (नार्क) को सिफारिसमा २०६१ साल मंसिर २९ गतेको मन्त्रिस्तरीय निर्णयबाट असार १५ गतेलाई धान दिवसका रुपमा मनाउन शुरु गरिएको हो । यसवर्ष सरकारले काठमाडौँको दक्षिणकालीमा धान दिवसको आयोजना गरेको छ ।

कृषिको परनिर्भरता कम गर्न र किसानलाई हौसला पुर्‍याउन प्रत्येक वर्ष धान दिवस मनाइँदै आएको हो । यो दिवसका अवसरमा कृषि तथा भूमि व्यवस्थापन तथा सहकारी मन्त्री चक्रपाणी खनाल बलदेवले कपिलबस्तुमा पुगेर धान रोपेका छन् । त्यसक्रममा तिलौराकोटमा उनले सहभागिहरुसँग नाच्दै–गाउँदै धान रोपेका छन् । दबदबे हिलोमा शुक्रबार विहानै सहयोगिका साथ खेतमा विउ बोकेर पुगेका खनालले अरु सहभागि भन्दा छिटोछिटो धान रोपेको देखेर अन्य सहभागिहरु चकित परेका थिए ।

नेपालमा चैते धान, वर्षे धान, घैया धानको खेती हुँदै आएको छ । उन्नत जातको बीउको प्रयोग कम हुनु, रासायनिक मल समयमा उपलब्ध नहुनु, अधिकांश कृषकहरु परम्परागत खेतीमै निर्भर रहने कारण पनि धान उत्पादनमा वृद्धि हुन सकेको छैन । यो वर्ष असार १५ भइसक्दा पनि सिँचाइ अभावमा यो वर्ष देशका अधिका‌ंश भागमा राेपाइँ हुन सकेको छैन । मौसम पूर्वानुमान महाशाखाले यो वर्षको मनसुन देशैभरि फैलिए पनि तीन दिनसम्म देशका धेरै स्थानमा सामान्यदेखि मध्यम वर्षाको सम्भावना रहेको जनाएको छ ।

महाशाखाका अनुसार क्रमिक रुपमा मनसुनी वर्षाको गतिविधि बढ्नेछ । सरकारले चामललगायतका खाद्यवस्तु आयात प्रतिस्थापन गरी खाद्यान्नमा आत्मनिर्भर बन्ने घोषणा गरे पनि चालू आर्थिक वर्ष ०७४\७५ को गत वैशाखसम्म चीन, भारत, थाइल्याण्ड, जापान, इटलीलगायतका मुलुकबाट २४ अर्ब ४९ करोड ८० लाखको चामल आयात भएको भन्सार विभागले जनाएको छ ।  संयुक्त राष्ट्रसंघले सन् १९६६ लाई ‘भोकमरीबाट मुक्त’ भन्ने नारासहित  धानबालीलाई वर्षबालीका रूपमा मनाउने घोषणा गरेको थियो । नेपालले भने २०६२ सालदेखि धान दिवस मनाउन थालेको हो ।

प्रतिक्रिया दिनुहोस्