Logo

पत्रकार महासंघको मिशन टोली घाइते पत्रकार जैसीको घरमा



‘आफु सुरक्षित भएपछि मात्र अरुको सुरक्षाका बारेमा कलम चलाउन र आवाज उठाउन सकिन्छ’

बौनिया(कैलाली)। पत्रकार महासंघका केन्द्रिय उपाध्यक्ष विपुल पोख्रेलले कैलालीका पत्रकार लक्ष्मि जैसीलाई उनकै निवासमा भेटेर उनको स्वास्थ्य अबस्थाका बारेमा जानकारी लिएका छन् । पत्रकार जैशीलाई एक साता अगाडि घरमै सुतिरहेको बेलामा अपरिचित समूहले आक्रमण गरी घाइते तुल्याएको थियो । नेपाल पत्रकार महासंघको प्रदेश नं. ७ मा खटिएको मिशन टोलीको नेतृत्व गर्दै पोख्रेलले उनीसंग भेट गरेका हुन् ।
जैशीको टाउकोमा चोट लागेको छ भने नियमित उपचार गराइरहेका छन् । ‘दैनिक रुपमा ड्रेसिङ गर्नु पर्छ, कमजोर महसुस हुन्छ’ उनले उपाध्यक्ष पोख्रेलसंग भने, ‘मानसिक रुपमा पनि अझै सिंगो परिवार नै आतंकित छौ ।’ बेलुकाको समयमा परिवारका सदस्यहरु ‘तै चुप–मै चुप’को अबस्थामा रहने र मनमा त्रास पालेर रात काट्ने गरेको पनि उनले बताएका थिए । अपरिचित समूहले जैसीलाई घाइते बनाउनुका साथै उनीसैग रहेको पैसा र गरगहना गरी झण्डै ७ लाख समेत लुटेको थियो । पत्रकार जैसीलाई बचाउन खोज्ने उनकी आमाको दाँतसमेत भाचिएको छ ।
भेटका क्रममा उपाध्यक्ष पोख्रेलले अनुसन्धान प्रक्रियालाई तिब्र बनाउन प्रशासन समक्ष आग्रह गरेको जानकारी दिदै पत्रकार जैसीलाई आफुलाई असुरक्षित महसुस हुनासाथ प्रशासन र पत्रकार महासंघलाई जानकारी गराउन आग्रह गरेका थिए । ‘सबैभन्दा पहिलो आफु सुरक्षित हुने हो, आफु सुरक्षित भएपछि मात्र अरुको सुरक्षाका बारेमा कलम चलाउन र आवाज उठाउन सकिन्छ’ पोख्रेलले त्यसक्रममा भने, ‘बलियो मानसिकताका साथ राम्रो उपचार तर्फ ध्यान दिनु नै उचित हुनेछ ।’
पोख्रेलले कैलालीका प्रहरी प्रमुख र स्थानीय बौनिया इलाका प्रहरी कार्यालयका प्रमुखलाई समेत भेट गरी सो घटनाका दोषिलाई कानूनी दायरामा ल्याउनका लागि थप सक्रिय हुन आग्रह पनि गरेका छन् । त्यसक्रममा पत्रकार महासंघका केन्द्रिय सदस्यद्वय मीन बम र उत्तरबहादुर बिष्ट पनि रहेका थिए । त्यसअवसरमा पत्रकार जैसीको उपचारका लागि टिकापुरका पत्रकारहरुले संकलन गरेको सहयोग रकम समेत हस्तान्तरण गरिएको थियो ।

प्रतिक्रिया दिनुहोस्